Asosyasyon LEVE siyen patenarya ak Inivèsite Leta Ayiti pou ede sosyete a devlope peyi a ak konesans kreyòl ayisyen ka pote pou moun ki pale l. Sa mande fòme plizyè pwomosyon tradiktè ki aksepte misyon louvri baryè eritaj entelektyèl mondyal la pou kreyolofòn ayisyen yo. Rezilta n ap tann pwogram fòmasyon sa a pote, tank pwomosyon sou
pwomosyon
ap diplome, se rasanble yon kantite tradiktè pwofesyonèl
konsekan ki pare pou sèvi ak konpetans yo pou konsolide sistèm edikasyon an epi pou lòt moun ak
òganizasyon lan sistèm administratif/ekonomik peyi a. Kon sa y a eksplate tout potansyèl
kreyòl la
pou kominote k pale l la ak kominote k pale franse a epi simante relasyon ak inyon sosyete a pou n ka viv pi byen. Fò
n ranfòse bibliyotèk kreyòl ayisyen an tou, rapid, avèk liv ki ekri nan de lang nan tout domèn.
Se nan kòz sa a nou envite w. Youn nan kondisyon pou w ladan l se maton pou w maton nan franse ak nan kreyòl. Si w pase nan konkou n ap
òganize a, ou angaje tèt ou toujou la nan tout kou yo epi pou w tradui omwen 100 paj liv nan fòma edisyon LEVE pou pwojè prensipal pandan w ap pran fòmasyon an. W ap gen pou w fè sa tou, pandan senk an si w rive pran sètifka w, nenpòt kote lavi w mennen w,
nenpòt kote w ye sou tè a. Pandan peryòd sa a, chak tradiktè ki manm LEVE asepte nan pwogram lan ap ka amelyore konesans li. Chak tradiktè ap resevwa yon pati nan kòb liv li tradui yo ki vann dapre kontra l ap gen pou l pase ak LEVE pou piblikasyon l yo.